Það er óumdeilt að krabbamein hefur áhrif á alla fjölskylduna, bæði þá sem greinast og ástvini þeirra. Í slíku ferðalagi skiptir máli að finna stað þar sem bæði líkami og sál fá stuðning til að takast á við áskoranir og endurheimta lífsgæði. Það er einmitt það sem Ljósið stendur fyrir.

Ljósið er einstakt úrræði sem veitir þverfaglega og einstaklingsmiðaða endurhæfingu fyrir fólk sem hefur greinst með krabbamein, ásamt stuðningi og fræðslu fyrir aðstandendur. Starfið okkar miðar að því að hjálpa fólki að ná jafnvægi á ný – bæði líkamlega, andlega og félagslega. Við erum stolt af því að skapa umhverfi sem er bæði hlýlegt og heimilislegt, þar sem fólk fær alhliða stuðning á einum stað.

Heilbrigðisþjónusta með hjartað í forgrunni
Við höfum lagt okkur fram um að fylgja nýjungum í krabbameinsendurhæfingu, og Ljósið er einstakt á heimsvísu fyrir sína nálgun. Hér hittir fólk fjölbreytt teymi sérfræðinga sem vinna saman að því að meta heildrænt ástand hvers og eins og setja upp meðferðaráætlun sem tekur mið af bæði líkamlegum og andlegum þörfum. Hvort sem um ræðir verkjastjórnun, stirðleika, orkuþrot eða kvíða, þá leggjum við metnað í að mæta fólki þar sem það er statt – og hjálpa því að taka skrefin áfram.

Við gleymum ekki aðstandendum, sem oft þurfa einnig á stuðningi að halda. Þeir fá aðgang að fræðslu, stuðningi og úrræðum sem hjálpa þeim að vera til staðar fyrir ástvini sína á þessu krefjandi ferðalagi.

Áhersla á nýja tíma
Í Ljósinu vinnum við líka stöðugt að því að gera þjónustu okkar aðgengilega fyrir sem flesta. Með fjarheilbrigðisþjónustu getum við veitt einstaklingsviðtöl og námskeið fyrir fólk á landsbyggðinni, þar sem fjarlægðir mega ekki standa í vegi fyrir endurhæfingu. Jafnframt höfum við þróað fjölbreyttar leiðir, eins og jóga, hugleiðslu og sérsniðin hópúrræði, til að mæta mismunandi þörfum þjónustuþega okkar.

Ljós í lífi margra
Í gegnum árin höfum við fengið ótal kærleiksríkar kveðjur frá þeim sem hafa notið þjónustu okkar. Algengt er að heyra fólk segja: „Hvar væri ég án Ljóssins?“ Þessi orð minna okkur á hversu dýrmætt það er að geta verið skjól og von fyrir fólk á erfiðum tímum.

Í þessu tölublaði Ljóssins má finna fjölda hugvekjandi greina og viðtala sem snerta allt frá persónulegum sögum og upplifun fólks til áhugaverðra sjónarhorna á líkamlega, andlega og félagslega heilsu. Við ræðum líka mikilvægi hreyfingar, jafningjastuðnings og þess að leyfa lífinu að fá lit á ný. Við vonum að lesendur finni innblástur í þessu efni, rétt eins og við finnum innblástur í öllum þeim sem til okkar leita.

Þakklæti okkar er óendanlegt til þeirra sem styrkja Ljósið, hvort sem það er með fjárframlögum, sjálfboðaliðastarfi eða öðrum hætti. Þið eruð að kveikja ljós í lífum fólks sem þarf á því að halda.

Lifi Ljósið!

Erna Magnúsdóttir, iðjuþjálfi og framkvæmdastýra Ljóssins